الى الارواح المحلقه في عالمي المختبئ الهادئ.....اتمنى ان تجدوا بين أسطري ما عجزت ان اجد وافهم ... لم اكن تلك المميزه.... ولا الشاعره المبدعه...ولكني فخوره بنفسي ...اعترف بأن القلوب تــُسرق ..واعترف اني قد أسأت الاختيار في أغلب قرارات حياتي .......مريم كانت هنا ... ....

السبت، 6 مارس 2010

مدري والله وش أبـــي..!!



ما بقى لك يا حبيبي أي شئ 
وما تركت لموقفي اي اختيار


لقيت أمري في خفوقك منتهي 
وللأسف مدري متى خذت القرار


وش اسوي بحبك اللي فيني حيّ
ما دريت  إنك  بتتركني  دمـــار


من عرفتك  وانا  قلبي  معتمي 
ما يشوف  الأ على ذاك  المسار 


مايصدق في غلاتك اي حكي 
ويعشق الغتره مع ذاك السمار 


إيه نعم ما كنت لك شخصٍ وفيّ
بس لك في داخلي بيت وعمار 


وترى البشر اخطائهم ما تنتهي
وأنا بشر مهما جرى مني وصار 


ما إنتبهت إنك بإسلوبٍ خفي 
توصل رساله ومكتوبه بنار 


التعامل ومن زمن رايح وطيّ
ما عملت لعشرتي أي إعتبار 


من بدلك يا صاحب القلب النديّ
وينه اللي كان لي شمس ونهار 


تقول إن طبعي وطبعك ما يجي..!
إنتي  الهزيمه  وأنا  دايم  إنتصار 


وفي عز ما عيني بعينك تلتقي
ألقاك  تتأمل  عيوني  بإحتقار 


بعد هذا مدري والله وش أبي
وليه اتحمل جروحك والشرار


ولاصار انا في داخلي قلبٍ شقيّ
يعشق عذابك والهجر عنده إنهيار


لزوم آخذ من الكرامه ما بقي 
واستوعب إني كنت نزوه وتذكار 


ما ألومك كله من قلبي الغبي 
اللي عطاك بدون حسبه ومقدار 


يلا حبيبي خانت العبره الحكي 
والا أساساً مافيه عندي اي خيار 

وسلامتكم